EAJ - PNV

Bestalde, adierazi du baita “azken aldi honetan, gehiegi ari gara Ezker Abertzalearen probokazioa jasaten. EAJ bilakatu dabe beren haserre guztien erantzule, beren arazoen konponbide eske joakezanen presioetatik ihes egiteko.Beren militanteak lasaitzeko atxakia”.

“Asko dira kontsignak, asko dira egunotan Ezker Abertzalearen aldetik egin diren adierazpenak. Pernando Barrenarengandik hasita, Laura Mintegi, Maribi Ugarteburu eta Joseba Permachen aldetik, EAJ seinalatu dabe oraingo blokeoaren –errudun-. Horrek be, aukera abertzale handienen arteko aurkaketa fase barria markatu dau” azaldu du.

Buruzagi abertzalearen aburuz, “Ezker Abertzalea tematuta dago bere arazo guztien errua beti inori leporatzen. Eurak ez dira ezeren errudun. Errua beti inorena, eta bereziki EAJrena. Baina, uste dot, ispilu aurrean jartzeko ordua heldu jakela”. “Esate baterako, azken nahaspilako protagonista, Urtza Alkorta, ez ete da egiten dauanaren erantzukizuna bereganatzeko gai? Ez ete dago bere militantziagaz harro? Ez ete dau onartzen, egiten dauan guztia bere borondatez egiten dauala? Eta, ez ete dauz ondorioak onartzen? Bere atxiloketa saihestezina zala onartu baeban, zergatik onartu eban Ondarroan antolatu zan muntaia? Ez ete eban jarrera horrek ekarren arriskua baloratu? Pentsatzen ete dabe batzuek – eurek- gura dabena egin ahal dabela, dana dalakoa “doban” urtengo jakela pentsatuta?”.

“Ertzaintzari – eta EAJri– leporatu deutsie, espainiar boterearen mende makurtu dirala. Eta, egoera horren aurrean, Ertzaintzak zer egin behar eban,bada? Bere derrigorra bete barik itzi behar eban,ala? Bere lana Guardia Zibilaren ardurapean itzi? Ez da izango gatazka bizia bilatzen ebela?” galdetu du Atutxak.

Bukatzeko azpimarratu du “herri bat ezin da amorruaren oinarrian eraiki. Herri bat, egunez egun eraiki behar da, urratsez urrats. Lasterbiderik hartu barik. Inork ez daiala zalantza txikiena izan: Euskadik aurrera egingo dau. Kosta ahala kosta, datorrena datorrela, gustatu ala. Eta hori lortzeko, Euzko Alderdi Jeltzaleak bere onena emongo dau”.